Jennifer Aniston dhe Reese Witherspoon do të kenë ne krah në sezonin e ardhshëm të serialit “The Morning Show” aktoren franceze Marion Cotillard, e cila do të interpretojë një figurë të fortë të botës së medias.
Megjithëse talenti i Cotillard nuk vihet kurrë në diskutim, përzgjedhja e saj ka hapur debat. Tabloidi britanik Daily Mail nënkupton se kjo lëvizje mund të lidhet me një histori të vjetër dhe një rivalitet të heshtur mes Jennifer Aniston dhe Angelina Jolie. Madje, disa e kanë parë si një formë “hakmarrjeje të vonuar”.
Sipas shkrimit, Marion Cotillard është e vetmja grua për të cilën Jolie ka treguar ndonjëherë xhelozi gjatë kohës që ishte e martuar me Brad Pitt. Thashethemet nisën gjatë xhirimeve të filmit Allied në vitin 2016, kur Jolie dyshonte se Pitt kishte krijuar një afërsi të rrezikshme me kolegen e tij franceze.
“Brad ishte i tërhequr nga eleganca dhe stili francez i Marion-it. Ajo është ndoshta gruaja që Angelina e urren më shumë se këdo tjetër. Ishte hera e vetme kur ajo tregoi hapur xhelozi. Situata ishte e tensionuar. Jolie e kishte ende të freskët mënyrën se si nisi romanca me Pitt gjatë xhirimeve të Mr. & Mrs. Smith, ndaj kishte frikë se historia po përsëritej", tha një burim anonim për Daily Mail.
Raportime të mëhershme nga Page Six dhe New York Post tregojnë se ndarja e Jolie dhe Pitt ndodhi pas një debati të ashpër në një avion privat, zyrtarisht për arsye që lidhen me fëmijët. Por sipas burimeve të tjera, Jolie kishte punësuar një hetues privat për të ndjekur Pitt gjatë xhirimeve të Allied, nga frika se ai po kishte një lidhje me Cotillard. Aktorja franceze dhe partneri i saj, regjisori Guillaume Canet, i kanë hedhur poshtë vazhdimisht këto zëra.
