Matthew Koma, bashkëshorti i aktores dhe këngëtares Hilary Duff, ka reaguar ashpër ndaj deklaratës personale të publikuar nga Ashley Tisdale në The Cut, ku kjo e fundit tregonte arsyet pse vendosi të largohej nga një grup nënash që ajo e përshkroi si “toksik”.
Koma, 38 vjeç, publikoi në Instagram Story një foto satirike, ku kishte montuar fytyrën e tij mbi trupin e Tisdale, duke e shoqëruar me një titull ironik dhe kritik. Në imazh shfaqej logoja e The Cut dhe një titull fiktiv që e quante aktoren “personin më egoist dhe të shkëputur nga realiteti”, ndërsa nëntitulli shkruante: “Një rrëfim i një grupi nënash, nga këndvështrimi i një babai.”
“Lexoni intervistën time të re me @TheCut,” shkroi Koma me ironi, duke lënë të kuptohet se postimi ishte një kundërpërgjigje direkte ndaj shkrimit të Tisdale, i publikuar më 5 janar.
Në intervistën e saj, Ashley Tisdale foli për përvojën personale me një grup nënash, pa përmendur emra, duke theksuar se largimi nga marrëdhëniet që nuk ndihen më të shëndetshme është një akt vetërespekti. Ajo tregoi se kishte filluar të ndjehej e përjashtuar pasi vuri re se nuk ftohej më në takimet e grupit dhe shihte në rrjete sociale foto të miqve së bashku pa të.
“Në fillim i justifikova. Mendova se ishim të gjithë të zënë dhe se nuk ishte diçka personale,” shkroi Tisdale. Megjithatë, pas disa rasteve të përsëritura, ajo kuptoi se përjashtimi ishte i qëllimshëm dhe se grupi kishte një model të përsëritur të lënies jashtë të një personi.
Intervista erdhi një muaj pas një postimi të saj në blog, i cili u bë viral, ku Tisdale theksonte se nënat kanë të drejtë të largohen nga grupet që kthehen në ambiente toksike, për shkak të dinamikave negative dhe sjelljeve të tipit “mean girls”.
Reagimi i Matthew Koma ka nxitur diskutime të shumta në rrjete sociale, duke ndarë opinionin publik mes atyre që mbështesin mesazhin e Tisdale dhe atyre që e shohin reagimin e tij si kritikë të drejtpërdrejtë dhe provokuese ndaj aktores.
