Një ngjarje tragjike ka tronditur opinionin publik në Britaninë e Madhe, pasi një nënë e re e dy fëmijëve humbi jetën vetëm dy ditë pas kryerjes së disa ndërhyrjeve estetike në Turqi.
Sophie Hunt, 34 vjeçe, nga Northampton, ndërroi jetë në një spital privat në Stamboll, si pasojë e komplikacioneve të rënda shëndetësore që pasuan operacionet. Ajo kishte kryer një ndërhyrje për shtrëngimin e barkut, si edhe procedurën e njohur si Brazilian Butt Lift (BBL).
Sipas familjarëve, pas ndërhyrjeve kirurgjikale, gjendja e saj shëndetësore u përkeqësua ndjeshëm. Sophie pësoi dështim të shumëfishtë organesh dhe tre arreste kardiake, duke mos arritur të mbijetojë pavarësisht përpjekjeve të stafit mjekësor.
Nëna e saj, Sandra Hunt, ka ngritur pikëpyetje serioze mbi mënyrën se si u vlerësua gjendja shëndetësore e vajzës përpara operacionit. Ajo ka deklaruar se ekzistonin dokumente mjekësore që tregonin shenja të ritmit të parregullt të zemrës, duke vënë në dyshim nëse Sophie ishte e përshtatshme për t’iu nënshtruar këtyre procedurave.
Familja ka bërë të ditur gjithashtu se pas operacionit, Sophie humbi ndjenjat dhe shfaqi ënjtje në duar, ndërsa janë ngritur dyshime edhe për komplikacione të mundshme gjatë procedurës së BBL-së.
Rasti ka rikthyer sërish në vëmendje debatet mbi sigurinë e ndërhyrjeve estetike jashtë vendit dhe nevojën për kontrolle të rrepta mjekësore përpara procedurave të tilla.
