Gjiganti zviceran i ushqimeve Nestlé ka njoftuar për një vjedhje të pazakontë që përfshin rreth 12 ton çokollata KitKat, që përkthehen në rreth 413,793 copë.
Sipas deklaratës së kompanisë me seli në Vevey, ngarkesa u zhduk gjatë transportit nga një fabrikë në Itali drejt Polonisë, ku produktet do të shpërndaheshin në tregjet evropiane. Automjeti dhe mallrat ende nuk janë gjetur.
Nestlé paralajmëroi se çokollatat e vjedhura mund të përfundojnë në tregje jozyrtare në gjithë Evropën. Megjithatë, kompania theksoi se çdo produkt mund të identifikohet përmes kodeve unike të serisë të vendosura në paketim.
Një zëdhënës i KitKat bëri të ditur se konsumatorët, shitësit dhe shpërndarësit mund të kontrollojnë origjinën e produkteve duke skanuar këto kode. Në rast përputhjeje me ngarkesën e vjedhur, sistemi do të japë udhëzime të qarta për të njoftuar kompaninë.
Në reagimin e saj, kompania theksoi me ironi se “kriminelët kanë shije të shkëlqyer”, por nënvizoi se vjedhjet e ngarkesave po bëhen një problem gjithnjë e më i madh për bizneset. Sipas saj, skemat kriminale po bëhen gjithnjë e më të sofistikuara, ndaj publikimi i rastit synon të rrisë ndërgjegjësimin për këtë fenomen në rritje.
