Nick Reiner, 32 vjeç, i akuzuar për vrasjen e prindërve të tij, regjisorin Rob Reiner dhe Michele Singer Reiner, ka folur për herë të parë gjatë paraqitjes së tij në gjykatë të mërkurën, më 17 dhjetor.
Ai u shfaq në Gjykatën e Lartë të Los Anxhelosit duke veshur një uniformë të veçantë kundër vetëvrasjes dhe me pranga. I ulur pas xhamit, Nick Reiner foli për herë të parë në gjykatë, por nuk dha përgjigje ndaj akuzave për vrasje.
Kur gjyqtari e pyeti nëse ishte dakord të hiqte dorë nga e drejta për një vendim gjykimi të shpejtuar, ai iu përgjigj shkurt: “Po, zotëri gjyqtar.”
Sipas Prokurorisë së Qarkut Los Anxhelos, Nick është akuzuar për dy akuza për vrasje me paramendim, me një rritje të mundshme të dënimit për rrethana të veçanta, përfshirë përdorimin e një arme të rrezikshme, si thika. Nëse shpallet fajtor, ai rrezikon dënim me burg të përjetshëm pa mundësi lirimi ose dënim me vdekje. Ai mbahet pa mundësi lirie me kusht.
Trupi i Rob, 78 vjeç, dhe Michele, 70 vjeçe, u gjet në shtëpinë e tyre në Brentwood, Los Anxhelos, të dielën më 14 dhjetor, nga anëtarët e Departamentit të Zjarrfikësve, pas një telefonate për ndihmë mjekësore. Nick u arrestua rreth gjashtë orë më vonë pranë kampusit të Universitetit të Kalifornisë Jugore.
Burime pranë familjes kanë treguar se tragjedia ndodhi pas një marrëdhënie të tensionuar gjatë një feste Krishtlindjesh të organizuar nga Conan O’Brien, ku Nick kishte pasur sjellje të çuditshme dhe shqetësuese për të tjerët. Motivi i dhunës mbetet ende nën hetim, ndërsa Nick ka folur më parë hapur për luftën me varësitë dhe situatën e pastrehisë që ka pasur që në adoleshencë.
Fëmijët e tjerë të çiftit, Jake dhe Romy, kanë lëshuar një deklaratë duke thënë se humbja e prindërve është një përvojë që askush nuk duhet ta përjetojë, duke kërkuar respekt, privatësi dhe kujtim për jetën e tyre dhe dashurinë që kanë dhënë.
