Princi dhe Princesha e Uellsit kanë zbuluar portretin e ri familjar, i cili do të shoqërojë kartolinën e tyre zyrtare të Krishtlindjeve për vitin 2025. Në fotografi, William dhe Catherine shfaqen të ulur në barin e gjelbër, të rrethuar nga lule narcisë pranverore, së bashku me tre fëmijët e tyre: Princin George, Princeshën Charlotte dhe Princin Louis. Imazhi është shpërndarë në rrjetet sociale të çiftit, shoqëruar me mesazhin e thjeshtë:
“Ju urojmë të gjithëve një Krishtlindje të Gëzuar.”
Fotografia është realizuar në muajin prill në Norfolk, nga fotografi Josh Shinner, dhe përcjell një atmosferë të qetë, familjare dhe intime. Pa formalitet të tepruar, pa kravata apo poza solemne, portreti përforcon idenë e një monarkie më të afërt, më natyrale dhe më bashkëkohore – një vizion që Princi William ka theksuar shpesh se dëshiron ta sjellë ndryshe.
Kartolina e këtij viti ka edhe një domethënie të veçantë personale, pasi shënon rikthimin gradual të Catherine në jetën publike, teksa ajo vijon shërimin pas trajtimit me kimioterapi për kancer. Prania e saj e buzëqeshur pranë familjes reflekton forcë, bashkim dhe shpresë.
Pamjet mendohet se janë realizuar gjatë të njëjtit sesion fotografik nga i cili u publikuan edhe fotot e ditëlindjes së 12-të të Princit George dhe 7-të të Princit Louis.
Një vit më parë, kartolina e Krishtlindjeve kishte një ngarkesë edhe më emocionale, pasi ishte marrë nga videoja ku Catherine njoftonte përfundimin e kimioterapisë. Në janar të këtij viti, ajo konfirmoi se ishte në remision dhe bëri një rikthim prekës në spitalin ku kishte marrë trajtim.
Gjatë muajve në vijim, çifti festoi 14-vjetorin e martesës gjatë një vizite zyrtare në ishullin Mull në Skoci, ndërsa në gusht u raportua se po përgatiteshin për zhvendosjen në shtëpinë e tyre të përhershme në Forest Lodge, Windsor.
Për festat e fundvitit, William dhe Catherine pritet të bashkohen me Mbretin Charles, Mbretëreshën Camilla dhe pjesën tjetër të familjes mbretërore në Sandringham, në Norfolk, ditën e Krishtlindjeve.
Ndërkohë, më herët këtë muaj, edhe Mbreti Charles dhe Mbretëresha Camilla publikuan kartolinën e tyre të Krishtlindjeve, të realizuar gjatë vizitës shtetërore në Itali, ku shfaqen të buzëqeshur në një shteg kopshti në Romë.
