Supermodelja britanike Naomi Campbell ka reaguar publikisht pasi emri i saj u përfshi në dokumente të reja të publikuara në kuadër të hetimeve federale që lidhen me financierin e ndjerë Jeffrey Epstein.
Sipas mediave ndërkombëtare, emri i 55-vjeçares përmendet në qindra materiale që lidhen me rrjetin e Epstein. Pas publikimit të tyre, Campbell reagoi përmes një postimi në Instagram Story, duke theksuar se nuk ka kryer asnjë veprim të paligjshëm.
“E kam thënë në vitin 2019 dhe e përsëris edhe tani: mos më akuzoni kur nuk kam bërë asgjë të gabuar,” u shpreh ajo, duke shtuar se qëndron në solidaritet të plotë me viktimat.
Ekipi i saj ligjor hodhi poshtë çdo pretendim për sjellje të pahijshme, duke pranuar se modelja e kishte njohur Epstein për vite me radhë, edhe pas dënimit të tij në vitin 2008. Megjithatë, avokatët theksuan se Campbell nuk kishte dijeni për aktivitetet kriminale të tij dhe nuk kishte pasur kontakte me të pas arrestimit në vitin 2019.
Sipas mbrojtjes së saj, nëse modelja do të kishte qenë dëshmitare e ndonjë situate abuzimi, ajo do të kishte reaguar menjëherë për të ndihmuar.
Dokumentet e publikuara përfshijnë referenca për Campbell në korrespondenca, email-e, ftesa për evente dhe shënime udhëtimi, duke treguar se ajo dhe Epstein kanë qenë në kontakt për disa vite. Disa persona kanë pretenduar gjithashtu se e kanë parë modelen në ambiente apo evente të lidhura me të.
Megjithatë, sipas dosjeve, nuk ekzistojnë prova që e lidhin Naomi Campbell me aktivitete kriminale dhe ajo nuk është akuzuar për asnjë shkelje ligjore. Modelja ka mbajtur të njëjtin qëndrim që prej vitit 2019, duke dënuar veprimet e Epstein dhe duke mohuar çdo përfshirje personale.
