Një emër i ri shqiptar po fiton me shpejtësi vëmendjen e industrisë europiane të filmit duke na bërë të gjithëve krenarë. Aktorja e re Fatlume Bunjaku është shpallur një nga 10 talentet më premtuese të kontinentit për vitin 2026, duke u nderuar me titullin prestigjioz European Shooting Star në kuadër të Berlin International Film Festival. Ky vlerësim konsiderohet si një nga trampolinat më të forta për karrierë ndërkombëtare, pasi prezanton aktorët e rinj para producentëve, regjisorëve dhe mediave më të rëndësishme të industrisë.
Bunjaku u përzgjodh për interpretimin e saj në filmin Hana, me regji të Ujkan Hysaj, rol që i siguroi vlerësime për ndjeshmërinë dhe forcën artistike. Përzgjedhja e saj u bë në kuadër të programit me po të njëjtin emër European Shooting Stars, një iniciativë e organizatës European Film Promotion, e cila çdo vit identifikon aktorët që pritet të dominojnë kinemanë europiane në të ardhmen.
Nominimi i saj u propozua nga Qendra Kombëtare e Kinematografisë, duke e bërë Bunjakun përfaqësuesen zyrtare të Shqipërisë në këtë program elitë. Ekspertët e industrisë e konsiderojnë këtë sukses si një hap vendimtar drejt projekteve të mëdha ndërkombëtare dhe një sinjal se një yll i ri shqiptar po lind në kinemanë europiane.
Në të njëjtin festival, vëmendje të madhe mori edhe këngëtarja me origjinë shqiptare, por me famë botërore Dua Lipa, e cila shkëlqeu në tapetin e kuq dhe u bë një nga figurat më të fotografuara të eventit, duke tërhequr interes të madh mediatik.
Prania e dy emrave shqiptarë një superyll global dhe një aktore në ngjitje e vendosi Shqipërinë në qendër të vëmendjes së këtij edicioni të Berlinales.
