Angelina Jolie mund të jetë gati të hapë një kapitull të ri larg Hollywood-it dhe Shteteve të Bashkuara. Sipas burimeve pranë aktores, ajo ka pritur që binjakët e saj, Vivienne dhe Knox, të mbushin 18 vjeç përpara se të realizojë një plan të menduar prej kohësh: zhvendosjen për të jetuar jashtë vendit.
Një burim për People ka treguar se Jolie nuk ka dashur kurrë të jetojë me kohë të plotë në Los Anxhelos, por marrëveshja e kujdestarisë me ish-bashkëshortin Brad Pitt e ka detyruar të qëndrojë në SHBA. Binjakët mbushin 18 vjeç më 12 korrik, duke i hapur rrugën aktores për të ndërmarrë këtë hap të madh.
Sipas të njëjtit burim, ajo po shqyrton disa destinacione të mundshme dhe pritet të jetë “shumë e lumtur” sapo të largohet nga Los Anxhelosi. Në një intervistë për The Hollywood Reporter në vitin 2024, Jolie theksoi se prioriteti i saj kryesor janë fëmijët.
“Kur ke një familje të madhe, dëshiron që ata të kenë privatësi, paqe dhe siguri,” është shprehur aktorja e filmit Eternals. Ajo ka shtuar se planifikon të kalojë shumë kohë në Kamboxhia, vend me të cilin ka një lidhje të fortë emocionale.
Jolie adoptoi djalin e saj të parë, Maddox, nga Kamboxhia në vitin 2002 dhe më vonë ka treguar se ky vend ndryshoi jetën e saj. Ajo është bërë gjithashtu një zë i fortë për çështjet humanitare dhe refugjatët, përmes angazhimit të saj me UNHCR.
Përveç Maddox, Jolie dhe Pitt adoptuan Zahara dhe Pax, ndërsa kanë tre fëmijë biologjikë: Shiloh, Vivienne dhe Knox.
Aktorja ka qenë e hapur edhe ndaj kritikave për situatën aktuale në SHBA. Gjatë një paneli në Festivalin e Filmit në San Sebastián, ajo u shpreh: “E dua vendin tim, por në këtë moment nuk e njoh më.”
Më herët, Jolie ka kundërshtuar politikat e emigracionit të presidentit Donald Trump, duke theksuar se siguria kombëtare nuk duhet të vijë në kurriz të diskriminimit.
