Debati për raportin e Vanesës me vëllain e saj është rikthyer sërish në qendër të vëmendjes në “Ferma VIP”, pasi Henri komentoi puthjen në buzë mes tyre, duke e cilësuar si një sjellje që nuk duhet transmetuar në televizion.
Gjatë spektaklit live, ai u shpreh se situata mund të ndikojë te fëmijët dhe mënyra si ata perceptojnë marrëdhëniet familjare.
“Nuk mendoj se është një shembull i duhur për ekranin. Madje nipi im i tha motrës së tij se donte ta puthte në buzë sepse e kishte parë në televizor”, deklaroi Henri, duke shtuar se sipas tij kjo lidhet me mënyrën si po ndryshojnë normat në shoqëri.
Deklarata e tij u kundërshtua nga Indri, i cili mbrojti Vanesën dhe i tha Henrit se po e shihte situatën me një mentalitet të vjetër.
“Po flet si brezi i gjyshit tim, ndërkohë që je ende i ri”, iu drejtua ai.
Nga ana tjetër, Vanesa reagoi e emocionuar dhe mes lotësh shpjegoi lidhjen e fortë që ka me të vëllanë. Ajo tha se marrëdhënia mes tyre është ndërtuar që në fëmijëri dhe se gjithmonë është kujdesur për të si për një fëmijë të sajin.
“Ai është shumë i rëndësishëm për mua. Jam rritur duke u kujdesur për të dhe kemi një afërsi që nuk di ta përshkruaj me fjalë. Kur erdhi këtu, u emocionova aq shumë sa më ikën forcat”, u shpreh Vanesa.
