Dy aktoret, të cilat luajtën së bashku në adaptimin filmik të muzikalit të njohur “Wicked”, tërhoqën vëmendjen e publikut për afrimitetin e tyre gjatë tureve promocionale, duke nxitur thashetheme për natyrën e marrëdhënies mes tyre.
Në një intervistë për revistën Stylist, publikuar më 10 shkurt, Erivo e përshkroi këtë situatë si “një magjepsje të çuditshme”.
“Njerëzit mendonin ose se po e bënim për kamerat, ose se ishim në një lidhje,” tha ajo.
Aktorja theksoi se publiku nuk është mësuar të shohë miqësi të thella dhe platonike mes grave në sy të publikut.
“Nuk jemi mësuar ta shohim këtë përpara kamerave. Një marrëdhënie e ngushtë ndonjëherë i bën të tjerët të ndihen në siklet; nuk jemi mësuar se këto lidhje janë të shëndetshme dhe të mira për ne,” u shpreh Erivo.
Nga ana tjetër, Ariana Grande kishte folur më herët për afrimitetin mes tyre gjatë një paraqitjeje në podcastin “Good Hang” të Amy Poehler. Këngëtarja tregoi se i pëlqen të shprehë energjinë përmes kontaktit fizik.
“Gjithmonë mbaj dorën e dikujt, shtrëngoj diçka ose zgjatem drejt dikujt që është pranë meje,” tha ajo, duke shtuar se me Erivo përpiqen të qëndrojnë të lidhura pavarësisht angazhimeve të shumta.
Të dyja artistet janë aktualisht në lidhje me persona të tjerë: Grande është në një marrëdhënie me kolegun e saj nga “Wicked”, Ethan Slater, ndërsa Erivo prej kohësh është në një lidhje me krijuesen e “The Chi”, Lena Waithe.
Ndërkohë, pjesa e dytë e filmit, “Wicked: For Good”, mbeti jashtë nominimeve të Oscar 2026. Kjo vjen pasi filmi i parë “Wicked” kishte marrë 10 nominime në Oscar 2025 dhe fitoi çmimet për Kostumografinë dhe Skenografinë më të Mirë.
