Reperi Capital T ka konfirmuar publikisht lidhjen e tij me modelen Adrola Dushi, duke i dhënë fund spekulimeve që kanë qarkulluar prej kohësh. I ftuar në Grida Duma Podcast, ai foli hapur për raportin e tyre dhe për mënyrën se si ka zgjedhur të menaxhojë jetën personale.
Artisti theksoi se lidhja nuk ka qenë kurrë sekret, por një zgjedhje e vetëdijshme për ta mbajtur larg vëmendjes së tepërt mediatike.
Gjatë bisedës, ai shpjegoi se arsyeja pse nuk shfaqet shpesh në media lidhet me faktin se pyetjet shpesh fokusohen në gjëra që publiku tashmë i di ose në tema sipërfaqësore. Sipas tij, mbajtja e privatësisë nuk do të thotë fshehje.
“Nuk ka qenë zgjedhje për ta mbajtur sekret, ka qenë zgjedhje për ta ruajtur privatësinë,” u shpreh ai.
Capital T shtoi se çdo gjë që ka rëndësi për një njeri mbrohet me kujdes dhe se, në kohën e sotme, mënyra më e mirë për ta mbrojtur jetën personale është vendosja e kufijve të qartë.
Edhe moderatorja Grida Duma theksoi se ruajtja e privatësisë është një zgjedhje legjitime, ndërsa reperi nënvizoi se kjo është mënyra që ai ka zgjedhur për të mbrojtur gjërat më të rëndësishme në jetën e tij.
