Ish-partnerja e këngëtarit Shpat Kasapi, Selvije Jao, ka ndarë së fundmi me ndjekësit e saj një mesazh të ndjerë, duke folur hapur për sfidat dhe fuqinë që kërkon roli i nënës beqare. Në një bashkëbisedim në InstaStory, një ndjekës e pyeti nëse ka qenë e vështirë të rrisë e vetme djalin e saj, Roelin.
Me sinqeritet dhe qetësi, Selvije u shpreh:
"Normal që po. Gjëja që unë kam ëndërruar gjithmonë ka qenë të kem familje dhe fëmija të rritet me të dy prindërit, por kjo është jeta.”
Megjithatë, pavarësisht zhgënjimeve apo ndryshimeve në jetën personale, ajo theksoi se fokusi i saj i vetëm mbetet mirëqenia e Roelit:
“Për Roelin do të luftoj që të rritet në një ambient ku mbizotërojnë qetësia dhe lumturia.”
Ajo shtoi se është e vendosur të bëjë gjithçka që djali të ketë një fëmijëri të shëndetshme dhe të mbushur me dashuri, duke shpresuar që gjithmonë të ketë forcën për të përballuar çdo sfidë që i del përpara.
Pavarësisht ndarjes nga Shpati, Selvije tregoi se marrëdhëniet midis tyre janë të mira për hir të djalit, duke vendosur stabilitetin e Roelit mbi çdo gjë tjetër.
Mesazhi i saj është pritur me shumë mbështetje dhe komente pozitive nga ndjekësit, të cilët kanë vlerësuar sinqeritetin, kurajon dhe përkushtimin e saj si nënë.
