Pas një periudhe të gjatë larg skenës, Demi Lovato ka vendosur të rikthehet fuqishëm përpara publikut. Artistja ka konfirmuar nisjen e turneut të saj të ri, “It’s Not That Deep”, i cili pritet të startojë në muajin prill. Lajmi u bë i ditur gjatë një eventi të mbajtur në 92NY në New York City.
Këngëtarja u shpreh se kjo është një fazë shumë pozitive në jetën e saj, ku ndjen më shumë qetësi dhe lumturi se kurrë më parë, duke theksuar se kjo gjendje reflektohet edhe në muzikën që po sjell.
Megjithatë, rikthimi në skenë pas një pauze të gjatë nuk vjen pa emocione të forta. Lovato pranoi se përjeton një përzierje emocionesh, nga entuziazmi i madh deri te ndjesia e ankthit, por theksoi se mezi pret të lidhet sërish me fansat e saj.
Gjatë turneut, ajo planifikon të interpretojë si këngë nga projekti i saj më i fundit, ashtu edhe hitet që e kanë shoqëruar ndër vite në karrierë. Artistja nuk përjashtoi as surpriza me materiale të reja. Një vend të veçantë zë kënga Sorry to Myself, të cilën e konsideron shumë personale dhe të lidhur ngushtë me rrugëtimin e saj emocional dhe librin që ka publikuar.
Lovato foli hapur edhe për sfidat që sjellin turnetë, duke pranuar se ato kërkojnë shumë energji fizike dhe emocionale, deri në pikën që dikur kishte menduar të largohej nga koncertet. Megjithatë, ajo theksoi se lidhja me publikun mbetet motivimi më i madh për të vazhduar.
Sipas saj, momentet kur fansat përjetojnë emocionet e muzikës së saj janë të pazëvendësueshme dhe e bëjnë gjithë sakrificën të vlefshme.
Ndërkohë, biletat për turneun “It’s Not That Deep” janë tashmë në dispozicion për publikun, ndërsa libri i saj i ri është publikuar dhe mund të gjendet në libraritë kryesore.
