Miss Universe Organization ka zbuluar detaje të reja mbi gjendjen e Miss Jamaica, Dr. Gabrielle Henry, e cila u lëndua rëndë pas një rënieje dramatike nga skena gjatë konkursit preliminar të Miss Universe më 19 nëntor 2025.
Në deklaratën e lëshuar të hënën, MUO dhe familja e saj bënë të ditur se Henry pësoi një hemorragji intrakraniale, humbje të vetëdijes, një frakturë dhe prerje në fytyrë, pasi ra përmes një hapësire të hapur të skenës gjatë sfilatës së fustanit të mbrëmjes. Ajo u dërgua menjëherë në kujdes intensiv në Bangkok, ku mbeti për disa ditë në gjendje kritike nën vëzhgim të vazhdueshëm neurologjik.
Sipas organizatës, gjendja e saj po stabilizohet, dhe në ditët në vijim pritet të transportohet drejt Xhamajkës me një ekip të plotë mjekësor, për të vazhduar trajtimin e specializuar.
MUO njoftoi gjithashtu se ka mbuluar të gjitha shpenzimet e trajtimit dhe rehabilitimit të Henry-t në Tajlandë, si dhe udhëtimin dhe akomodimin e familjarëve të saj. Organizata ka premtuar se do të mbulojë edhe çdo shpenzim të ardhshëm të lidhur me incidentin.
Në deklaratë u hodhën poshtë edhe thashethemet e qarkulluara online që fajësonin Henry-n për rënien, duke theksuar se “këto pretendime janë të pabazuara dhe nuk pasqyrojnë faktet”.
Kthimi i saj në atdhe shënon fillimin e një periudhe të gjatë rikuperimi, ndërsa mbështetja për të vijon të rritet si brenda ashtu edhe jashtë komunitetit të Miss Universe.
