Aktorët e njohur të serialit “Stranger Things”, Millie Bobby Brown dhe David Harbour, u shfaqën në tapetin e kuq të premierës së sezonit të pestë të serialit në Los Anxhelos, duke qeshur dhe përqafuar njëri-tjetrin vetëm pak ditë pas publikimit të lajmeve për një padi të ngritur nga Brown ndaj Harbour.
Në një video të postuar nga Netflix, dy aktorët duken të qeshur e të afërt, ndërsa platforma shkroi në përshkrim:
“David Harbour dhe Millie Bobby Brown mbërrijnë së bashku për premierën e fundit të Stranger Things ”.
Megjithatë, pas këtij momenti të gëzueshëm, qëndron një situatë shumë më e ndërlikuar.
Sipas raportimeve të The Daily Mail, Millie Bobby Brown ka paraqitur një padi ndaj David Harbour, duke e akuzuar për bullizëm dhe ngacmime gjatë xhirimeve të sezonit të fundit. Burime për median britanike thanë se hetimi i brendshëm ka zgjatur për muaj të tërë përpara se të fillonin xhirimet.
As Netflix, as përfaqësuesit e Brown apo Harbour nuk kanë dhënë ende një koment zyrtar mbi rastin.
Marrëdhënie e vjetër në ekran dhe jashtë tij
Millie, 21 vjeç, që luan rolin e “Eleven”, dhe Harbour, 50 vjeç, që interpreton “Jim Hopper”, kanë punuar bashkë që prej vitit 2015. Aktorët kanë ndërtuar një marrëdhënie të ngjashme me atë të personazheve të tyre një raport baba-bijë që shpesh është reflektuar edhe jashtë ekranit.
Në intervista të mëparshme, Brown ka treguar se “marrëdhënia me Harbour është si ajo e një babai me të bijën”, duke shtuar se “në disa raste kemi pasur debate e emocione të forta, por kjo e bën lidhjen tonë më reale”.
Polemikat që rrethojnë David Harbour
Kohët e fundit, Harbour është përfshirë edhe në një tjetër skandal mediatik. Ish-bashkëshortja e tij, këngëtarja britanike Lily Allen, ka publikuar albumin e ri West End Girl, ku përmes disa këngëve përshkruan fundin e martesës së tyre dhe e akuzon aktorin për tradhti bashkëshortore. Harbour nuk ka reaguar ndaj këtyre deklaratave.
Fundi i një epoke
Sezoni i pestë i Stranger Things, që pritet të jetë edhe i fundit, do të mbyllë një nga sagat më të dashura të Netflix-it, e cila nisi në vitin 2016 dhe e bëri Brown një nga aktoret më të famshme të brezit të saj.
