Miley Cyrus është përfshirë nga emocionet gjatë ceremonisë ku mori yllin e saj në “Hollywood Walk of Fame”, një nga vlerësimet më prestigjioze në industrinë e argëtimit.
Artistja amerikane mbajti një fjalim prekës në Los Angeles, ku falënderoi familjen, miqtë dhe bashkëpunëtorët për mbështetjen ndër vite, ndërsa nuk arriti të përmbante lotët.
“Faleminderit që më keni qëndruar pranë jo vetëm në sukseset e mia, por edhe në momentet e pasigurisë dhe frikës”, u shpreh Miley para të pranishmëve.
Në këtë ngjarje speciale morën pjesë nëna e saj Tish Cyrus, motra Brandi Cyrus dhe partneri Maxx Morando. Ceremonia u ndoq gjithashtu nga emra të njohur si Donatella Versace dhe Anya Taylor-Joy, të cilat e përgëzuan publikisht këngëtaren për arritjen.
Megjithatë, fansat vunë re mungesën e babait të saj, Billy Ray Cyrus, i cili nuk ishte i pranishëm në event.
Gjatë fjalimit, Miley foli edhe për kuptimin personal që ka ky vlerësim për të, duke e cilësuar si simbol të rrugëtimit dhe sakrificave të saj në muzikë dhe art.
“Kjo nuk është një arritje që vjen brenda natës. Është rezultat i viteve të tëra pune, përkushtimi dhe pasioni”, tha ajo.
Një nga momentet më emocionale ishte kur kujtoi fëmijërinë dhe vizitat e para në Hollywood me familjen e saj.
“Kur isha e vogël dhe vija nga Nashville, shëtisja natën me babin tim në Hollywood Boulevard. Blinim suvenire dhe ëndërronim. Tani fakti që emri im është pjesë e këtij bulevardi legjendar më duket surreal”, rrëfeu artistja.
Në fund të ceremonisë, Miley vendosi syzet e diellit për të fshehur emocionet, ndërsa e cilësoi këtë ditë si një nga momentet më të rëndësishme të jetës së saj.
