Shakira rikthehet në skenën e Kupës së Botës me një himn të ri spektakolar. Këngëtarja kolumbiane, në bashkëpunim me Burna Boy, ka publikuar videoklipin e këngës “Dai Dai”, e zgjedhur si himni zyrtar i Botërorit 2026.
Videoklipi, i publikuar më 23 maj, sjell një atmosferë festive dhe energjike, duke bashkuar muzikën me emrat më të mëdhenj të futbollit botëror. Në pamjet e klipit shfaqen yje si Lionel Messi, Kylian Mbappé, Erling Haaland, Vinicius Junior, Harry Kane, Rodri, Jamal Musiala, Christian Pulisic, Alphonso Davies, Luis Diaz, Santiago Gimenez dhe Takefusa Kubo.
Një pjesë e rëndësishme e videos i kushtohet edhe “Ghetto Kids Uganda”, organizata e njohur që ndihmon fëmijët jetimë dhe në vështirësi përmes artit dhe edukimit, duke i dhënë klipit një mesazh frymëzues dhe social.
Në një nga skenat më të komentuara, Shakira shfaqet mbi monumentin ikonë “Engjëlli i Pavarësisë” në Mexico City, si një tribut për Meksikën, vend që ka pasur ndikim të madh në rrugëtimin e saj artistik.
Paralelisht, është konfirmuar se artistja do të jetë pjesë e spektaklit historik të finales së Kupës së Botës 2026 më 19 korrik, ku do të performojë krahas emrave globalë si Madonna dhe BTS.
Ky projekt shënon rikthimin e Shakirës në universin e Botërorit, 16 vite pas suksesit të jashtëzakonshëm të “Waka Waka”, himnit legjendar të Kupës së Botës 2010 në Afrikën e Jugut.
