Laura Pausini do të jetë bashkë-prezantuese e edicionit të 76-të të Festivalit të Sanremos, që do të zhvillohet nga data 24 deri më 28 shkurt 2026, duke shoqëruar Carlo Conti gjatë pesë netëve të festivalit. Për këngëtaren nga Solarolo kjo është hera e parë si prezantuese në skenën e Aristonit, pas nëntë pjesëmarrjesh si konkurrente dhe mysafire e veçantë.
Këngëtarja, e cila debutoi në Sanremo në vitin 1993 duke fituar në seksionin e “Rinjve” me këngën La Solitudine, komentoi emocionin e saj në Instagram:
"Sanremo është fati im. Buzëqeshja ime. Tërheqja ime. Frika ime. Në Sanremo lindi arti im dhe këtë vit kthehem me krenari dhe emocion sepse do ta prezantoj festivalin. Laura e vitit 1993 nuk do ta kishte imagjinuar kurrë se në 2026 do të shkruante këto fjalë."
Carlo Conti shprehu gëzim dhe entuziazëm për bashkëpunimin: “Faleminderit Laura që prite me kaq entuziazëm ftesën time. Është një nder i madh të ndajmë prezantimin e Festivalit me një artiste dhe grua kaq të fortë, karizmatike dhe argëtuese.”
Laura Pausini, e njohur ndërkombëtarisht, ka një karrierë të pasur me suksese: Grammy, pesë Latin Grammy, Golden Globe, turne botërorë dhe albume të publikuara edhe në spanjisht. Ky rikthim në Ariston thekson lidhjen e veçantë të këngëtares me festivalin që e bëri të njohur për publikun.
