Në një intervistë ekskluzive për Bordo, Sheki Useini ka ndarë mendimet e tij mbi marrëdhënien e njeriut me paranë, duke shpalosur një perspektivë të thellë që lidhet me jetën, spiritualitetin dhe misionin e tij personal. Për Useinin, paratë nuk janë thjesht një mjet ekonomik, por një energji që reflekton mënyrën se si ato janë fituar dhe ndikojnë në mënyrën se si ndihet njeriu.
Sheki, i cili njihet si autor dhe mentor spiritual, ka udhëtuar dhe ka qëndruar në vende të ndryshme të botës, duke marrë pjesë në qendra meditative, përfshirë ashramet e OSHO-s në Indi, ku ka përvetësuar meditimin dinamik. Përmes eksperiencave të tij, ai ka mësuar se mënyra më e mirë për t’i fituar paratë është duke shtuar vlerë për të tjerët, pa dëmtuar askënd, pa thyer zemra dhe pa shkaktuar dhimbje.
“Paraja nuk është gjithçka, por të qetëson. Nuk qëndron tek paratë vetë, por tek mënyra se si i fiton. Nëse paratë i ke fituar me dashuri, me dhembshuri, duke shtuar vlerë për të tjerët, pa varfëruar dikë apo i marrë dikujt që nuk e meriton, atëherë nuk do bëhesh peng i parasë asnjëherë,” shprehet Useini.
Ai thekson se, në rast se paratë përdoren për të shkaktuar dëme, karma do të veprojë dhe më vonë njeriu do të kuptojë pse shumë njerëz thonë se “paraja prish karakterin”. Por sipas tij, paraja nuk e ndryshon njeriun, ajo vetëm zbulon karakterin që ekzistonte më parë. “Paraja prish vetëm karakterin e atij që nuk ka pasur karakter. Përndryshe, paraja është energji e mirë,” thekson Useini.
Për Shekin, paratë janë pjesë e një udhëtimi më të gjerë që lidhet me qetësinë, meditimin dhe zhvillimin e brendshëm. Ai beson se njeriu që fiton me ndershmëri dhe dhembshuri nuk bëhet rob i parasë, por e përdor atë si mjet për të ndihmuar dhe kontribuar tek të tjerët. Kjo përputhet me filozofinë e tij të përgjithshme për jetën: të jesh i vetëdijshëm për vetveten, të duash vetveten pa kushte dhe të shtosh vlerë në botë.
Sheki Useini, përtej eksperiencës me paratë, është një udhëheqës spiritual i cili kombinon meditimin, librat dhe përvojat e tij jetësore për të treguar se mënyra si e menaxhojmë pasurinë dhe energjinë e saj ka ndikim të drejtpërdrejtë mbi lumturinë, paqen e brendshme dhe marrëdhëniet me të tjerët.
Intervista e plotë më poshtë:
