Bota e muzikës ka humbur një nga emrat më të mëdhenj të xhazit. Sonny Rollins, saksofonisti ikonë amerikan i njohur për ndikimin e tij të jashtëzakonshëm në historinë e muzikës, ka ndërruar jetë në moshën 95-vjeçare.
Artisti u shua në banesën e tij në Woodstock, New York, më 25 maj, sipas konfirmimit të bërë nga përfaqësuesi i tij për mediat. Publicisti e përshkroi Rollins si një figurë unike dhe ndër muzikantët më të rëndësishëm që ka njohur muzika amerikane.
Karriera e tij nisi në fund të viteve ’40 dhe gjatë dekadave që pasuan ai u kthye në një emër të pazëvendësueshëm të skenës së xhazit. Rollins bashkëpunoi me artistë legjendarë si Miles Davis, Charlie Parker dhe John Coltrane, ndërsa gjatë jetës publikoi mbi 60 albume.
Mes veprave më të njohura të tij mbetet “Saxophone Colossus”, albumi i vitit 1956 që e konsolidoi si një nga saksofonistët më të mëdhenj të të gjitha kohërave.
I lindur në New York në vitin 1930 me emrin Walter Theodore Rollins, ai mori nofkën “Sonny” që në fëmijëri. Dashuria për muzikën nisi herët, pasi nëna i dhuroi saksofonin e parë kur ishte vetëm shtatë vjeç.
Gjatë karrierës së tij, Rollins fitoi dy çmime Grammy dhe u vlerësua vazhdimisht për stilin unik të improvizimit. Ai njihej për solo të gjata dhe spontane, shpesh pa ndonjë plan të paracaktuar muzikor.
“Ndonjëherë edhe vetë habitem me atë që del gjatë interpretimit,” kishte deklaruar ai në një intervistë për PBS.
Në fillim të viteve ’60, muzikanti kalonte orë të tëra duke ushtruar në Urën Williamsburg në New York, periudhë që frymëzoi më vonë albumin e famshëm “The Bridge”.
Pas sulmeve terroriste të 11 shtatorit 2001, Rollins dhe bashkëshortja e tij u larguan nga Manhattan drejt veriut të shtetit të New York-ut, ndërsa ai mori me vete vetëm saksofonin e tij.
Në vitin 2010, presidenti Barack Obama e nderoi me Medaljen Kombëtare të Arteve, duke vlerësuar ndikimin dhe frymëzimin që artisti kishte dhënë ndër vite.
Shkaku i vdekjes nuk është bërë publik.
