Menjëherë pas daljes nga paraburgimi, këngëtari Besart Kelmendi, i njohur si Gjesti, ka zgjedhur të thyejë heshtjen përmes një reagimi publik, ku ka ndarë reflektimet e tij mbi situatën e fundit.
Artisti pranon hapur se ka bërë një gabim dhe shpreh keqardhje për shqetësimin e shkaktuar, duke theksuar se ajo periudhë ka qenë jashtëzakonisht e rëndë për të. Sipas tij, presioni i vazhdueshëm ka ndikuar drejtpërdrejt në gjendjen emocionale, ndërsa shton se sjellja e tij nuk e përfaqëson atë që është në të vërtetë.
Ai falënderon të gjithë ata që i kanë qëndruar pranë gjatë kësaj kohe, duke e konsideruar mbështetjen e tyre si vendimtare. Një mirënjohje e veçantë shkon edhe për ekipin ligjor që e ka përfaqësuar.
Në të njëjtin reagim, Gjesti bën të ditur se ka ndërmarrë hapa ligjorë ndaj kompanisë Onima, të cilën e akuzon për padrejtësi të vazhdueshme, borxhe dhe dëme në karrierën e tij artistike. Ai paralajmëron se shumë të vërteta ende nuk janë zbuluar, por do të bëhen publike në vijim.
Pavarësisht situatës, këngëtari shprehet i vendosur të mos ndalet në muzikë, duke lënë të kuptohet se do të vazhdojë të sjellë projekte të reja për fansat, edhe përmes platformave sociale. Në fund, ai shpreh besimin se e drejta do të dalë në pah.
