Britney Spears është rikthyer në qendër të vëmendjes pas publikimit të detajeve nga arrestimi i saj për drejtim mjeti nën ndikimin e alkoolit në Kaliforni, ngjarje e ndodhur në muajin mars.
Sipas mediave amerikane, gjatë komunikimit me policinë, këngëtarja bëri deklarata të forta dhe të papritura për nënën e saj, Lynne Spears, duke rikujtuar një aksident të rëndë të ndodhur dekada më parë.
Kur oficerët e paralajmëruan për rrezikun e drejtimit të makinës në gjendje të dehur, Britney reagoi duke thënë se nëna e saj kishte qenë e përfshirë në një aksident fatal me një djalë të mitur dhe se nuk ishte përballur me pasoja ligjore.
Deklaratat e artistes lidhen me një episod të përmendur edhe në librin autobiografik të Lynne Spears, “Through the Storm”. Në libër, ajo tregon se në vitin 1975, gjatë motit të keq në Luiziana, automjeti i saj goditi aksidentalisht 12-vjeçarin Anthony Winters. Sipas raportimeve të kohës, nuk u ngritën akuza ndaj saj.
Pamjet nga arrestimi tregojnë gjithashtu Britney Spears duke mos kaluar testin e maturisë, ndërsa pranoi para policisë se kishte konsumuar alkool dhe disa medikamente me recetë, mes tyre Prozac, Adderall dhe Lamictal.
Pas incidentit, artistja kaloi përkohësisht në rehabilitim dhe më vonë arriti një marrëveshje ligjore për një akuzë më të lehtë. Gjykata e dënoi me një vit kusht dhe pjesëmarrje të detyrueshme në një program edukimi për përdorimin e alkoolit.
