Cili është sekreti për të jetuar mbi 100 vjeç? Kjo pyetje po merr gjithnjë e më shumë vëmendjen e shkencëtarëve, ndërsa një histori e jashtëzakonshme nga Brazili po studiohet me interes të veçantë.
Tre motra braziliane, me një moshë të përbashkët prej 316 vitesh, janë bërë pjesë e një kërkimi shkencor që synon të zbulojë faktorët që ndikojnë në një plakje të shëndetshme. Ato konsiderohen ndër grupet e motrave më jetëgjata të dokumentuara në botë.
Bëhet fjalë për Zulina de Deus Nunes, 103 vjeçe, Zoraide de Deus Mota, 104 vjeçe dhe Levita de Deus Nunes, 109 vjeçe. Pavarësisht viteve të shumta mbi supe, të tria kanë ruajtur një jetë aktive dhe kanë kaluar dekada të tëra të lidhura ngushtë me njëra-tjetrën.
Gjatë jetës së tyre ato kanë punuar, kanë krijuar familje dhe kanë përballuar vështirësi të ndryshme, duke mbështetur gjithmonë njëra-tjetrën. Sipas studiuesve, kombinimi i një stili të thjeshtë jetese, aktivitetit fizik, ushqyerjes së moderuar dhe lidhjeve të forta familjare mund të ketë luajtur një rol të rëndësishëm në jetëgjatësinë e tyre.
Historia e tre motrave është përfshirë në projektin shkencor “DNA Longevo”, i drejtuar nga shkencëtarja Mayana Zatz nga Universiteti i São Paulos. Projekti synon të analizojë faktorët biologjikë dhe gjenetikë që ndihmojnë disa persona të plaken në mënyrë më të shëndetshme.
Ekspertët po krahasojnë ADN-në e personave që kanë arritur mosha të avancuara me atë të individëve që preken nga sëmundje të lidhura me plakjen, në përpjekje për të zbuluar gjene që mund të ofrojnë mbrojtje ndaj këtyre problemeve.
Organizata LongeviQuest ka ndihmuar në verifikimin e moshës së tre motrave, të cilat jetojnë në Rio de Janeiro. Studiuesit theksojnë se gjenetika ka një ndikim të rëndësishëm në jetëgjatësi, por faktorë si ushqyerja, lëvizja, marrëdhëniet sociale dhe ekuilibri emocional janë po aq të rëndësishëm.
Për shkencëtarët, historia e këtyre tre motrave është një tjetër dëshmi se një jetë e gjatë nuk përcaktohet nga një element i vetëm, por nga një kombinim kompleks mes trashëgimisë gjenetike dhe mënyrës së jetesës.
