Pas vitesh diskutimesh, Franca ka miratuar ligjin për vdekjen e asistuar, duke u dhënë mundësi të rriturve me sëmundje të pashërueshme të kërkojnë medikamente për t’i dhënë fund jetës së tyre. Vendimi u miratua nga Asambleja Kombëtare me 291 vota pro dhe 241 kundër, pas një procesi të gjatë shqyrtimi parlamentar. Presidenti Emmanuel Macron e cilësoi votimin si përmbushje të një angazhimi që kishte marrë që në vitin 2022.
Sipas ligjit të ri, e drejta do të zbatohet vetëm për pacientët që plotësojnë kriteret e përcaktuara nga legjislacioni. Deri më tani, në Francë lejohej vetëm sedacioni i thellë për pacientët në fazë terminale, ndërsa vetëvrasja e asistuar dhe eutanazia ishin të ndaluara. Si pasojë, shumë qytetarë francezë janë detyruar të udhëtojnë jashtë vendit për të përfituar nga këto procedura.
Vetëvrasja e asistuar nënkupton që pacienti merr vetë medikamentin e përshkruar nga mjeku për t’i dhënë fund jetës, ndërsa në rastin e eutanazisë, procedura kryhet nga personeli shëndetësor me kërkesën e pacientit.
Megjithatë, ligji vazhdon të shkaktojë debat të fortë në Francë, duke ngritur diskutime ligjore, etike, morale dhe fetare, veçanërisht në një vend me traditë të fortë katolike. Ndërkohë, çështja e legalizimit të vdekjes së asistuar mbetet në qendër të diskutimeve edhe në vende të tjera evropiane, përfshirë Mbretërinë e Bashkuar.
