Një aksident tragjik ka ndodhur pak ditë më parë në aksin rrugor Librazhd–Elbasan, ku ka humbur jetën shtetasi kinez Li Jianhong, një emër i njohur në botën e biznesit dhe investimeve në Kinë.
Sipas informacioneve paraprake, Li Jianhong ishte një biznesmen me ndikim të gjerë, i njohur për aktivitetin e tij në disa sektorë kyç, përfshirë turizmin, telekomunikacionin dhe investimet. Ai ishte themelues i resortit të madh të skive “Silkroad Mountain” dhe president i grupit “Xinjiang Grand Scape”.
Karriera e tij në biznes nisi pas vitit 1993, duke ndërtuar ndër vite një korporatë të fuqishme me vlerë qindra milionë dollarë, e cila operonte në disa fusha strategjike.
Përveç suksesit në sipërmarrje, Li Jianhong njihej edhe si një alpinist i përkushtuar në nivel ndërkombëtar. Ai kishte përfunduar sfidën prestigjioze “Explorer’s Grand Slam”, që përfshin ngjitjen e majave më të larta në çdo kontinent dhe arritjen në të dy polet e Tokës.
Autoritetet shqiptare vijojnë hetimet për të zbardhur shkaqet e plota të aksidentit që i mori jetën biznesmenit kinez, ndërsa lajmi ka ngjallur reagime edhe në arenën ndërkombëtare.
