Muzeu i Luvrit rihapi dyert këtë të mërkurë, tre ditë pas një grabitjeje të guximshme që e detyroi të mbyllej për vizitorët. Një ngjarje që tronditi të gjithë Francën dhe jo vetëm për mënyrën se si ndodhi.
Hajdutët morën me vete bizhuteritë mbretërore, në një grabitje spektakolare e cila zgjati vetëm shtatë minuta, me vlerë të përgjithshme rreth 102 milionë dollarë.
Drejtoresha e muzeut, Laurence des Cars, do të përballet me pyetje nga komiteti kulturor i Senatit francez për masat e sigurisë, ndërsa presidenti Emmanuel Macron ka kërkuar përshpejtimin e përforcimeve të sigurisë.
Hetuesit po ndjekin katër të dyshuar që mendohet se ishin pjesë e një grupi kriminal të organizuar. Ata përdorën një shkallë mbi një kamion për të hyrë në muze dhe hodhën një kurorë të mbushur me diamante gjatë arratisjes, ndërsa autoritetet analizojnë gjurmët e gishtave dhe pamjet e kamerave të sigurisë.
Prokurorja e Parisit, Laure Beccuau, theksoi se humbja më e madhe nuk është financiare, por e trashëgimisë historike të Francës. Grabitja ka rikthyer debatet mbi sigurinë në muzetë franceze, pas sulmeve të tjera ndaj institucioneve kulturore muajin e kaluar.
