Chiara Ferragni, një nga influencueset më të njohura italiane, u shfaq me një fustan të firmës shqiptare Nensi Dojaka gjatë ndarjes së çmimeve “Los40 Music Awards” që u mbajt në Spanjë.
Fustani, i cili mbante firmën e stilistes londineze me origjinë nga Tirana, ishte një shembull i përsosur i estetikës karakteristike të Dojakës – linja minimaliste, rripa të hollë dhe prerje të guximshme që theksojnë elegancën përmes ndërtimit delikat të formës.
Sipas Grazia Daily UK, Nensi Dojaka njihet për “dizajnet e saj pothuajse të padukshme, që çojnë rripat e hollë, materialet e tejdukshme dhe de-strukturimin strategjik në një nivel të ri bukurie.”
Ky është një tjetër moment i rëndësishëm për Dojakën, e cila prej vitesh është bërë një emër i dashur për yjet botërorë. Rihanna dhe Hailey Bieber janë ndër figurat e famshme që kanë veshur krijimet e saj në paraqitje publike, duke e kthyer Nensin në një nga emrat më të spikatur të modës bashkëkohore.
Me këtë paraqitje, Chiara Ferragni jo vetëm që konfirmoi lidhjen e fortë midis modës italiane dhe asaj shqiptare, por njëkohësisht i dha krijimeve të Nensi Dojakës një tjetër skenë ndërkombëtare për të shkëlqyer.
