Chadwick Boseman është nderuar pas vdekjes me një yll në Hollywood Walk of Fame, pesë vite pas ndarjes së tij nga jeta si pasojë e kancerit të zorrës së trashë. Ceremonia e veçantë u festua nga familjarët, kolegët dhe bashkëpunëtorët e tij më të afërt.
E veja e aktorit, Simone Ledward-Boseman, ishte e pranishme për të marrë nderimin, ndërsa ylli i tij — i 2,828-ti në radhë — u përurua në një event të mbushur me emocion. Në ceremoni morën pjesë edhe aktorja Viola Davis dhe regjisori Ryan Coogler, figura që kanë bashkëpunuar ngushtë me Boseman.
I njohur për interpretimet e tij të paharrueshme si Jackie Robinson, James Brown dhe mbi të gjitha si T’Challa në universin Marvel, Boseman u vlerësua për ndikimin e jashtëzakonshëm kulturor dhe për trashëgiminë artistike që vazhdon të frymëzojë.
Viola Davis e përshkroi aktorin e ndjerë si një “eliksir të fuqishëm”, duke theksuar se fryma dhe dedikimi i tij vazhdojnë të jetojnë tek të gjithë ata që patën privilegjin të punonin me të.
