Usher ka ndarë mendimin e tij për Sean “Diddy” Combs, i cili ndodhet aktualisht në burg, duke zgjedhur ta përkufizojë me një fjalë të vetme: “trashëgimi”.
Në një intervistë për Forbes, këngëtari 47-vjeçar u pyet për përshtypjen e tij të parë kur mendon për themeluesin e Bad Boy Records. Edhe pse e pranoi se përgjigjja e tij mund të ngjallë debat, ai theksoi se nuk mund të anashkalohen arritjet dhe ndikimi i Combs në industrinë e muzikës dhe më gjerë.
Usher u shpreh se përvoja e tij personale me Diddy-n ka qenë ndryshe nga ajo që është pasqyruar publikisht, duke shtuar se nuk ka komente negative për të. Sipas tij, shumë persona kanë përfituar nga vizioni dhe puna e Combs ndër vite.
Ai e cilësoi atë si një figurë kyçe në biznes dhe kulturë, duke theksuar rolin e tij në kthimin e ideve kreative në sukses konkret. Gjithashtu, Usher kujtoi periudhën kur jetoi me të në adoleshencë, duke e përshkruar si një mentor kërkues, por me ndikim të madh në formimin e tij profesional.
Nga ana tjetër, Sean Combs u dënua vitin e kaluar me burg për çështje që lidhen me transport për prostitucion dhe aktualisht përballet me disa procese të tjera ligjore. Ai i ka hedhur poshtë akuzat më të rënda që rëndojnë ndaj tij.
