Gjykata Themelore në Ferizaj ka caktuar masën e paraburgimit prej një muaji ndaj reperit të njohur Betim Januzi, i njohur si Buta, pas një incidenti të rëndë që përfshiu përdorimin e armëve.
Sipas autoriteteve, ngjarja lidhet me një përleshje mes dy personave, e cila ka përshkallëzuar deri në përdorimin e një arme të ftohtë dhe një arme zjarri, duke rrezikuar seriozisht jetën e të përfshirëve dhe të qytetarëve përreth. Pas shqyrtimit të provave dhe zhvillimit të seancës dëgjimore, gjykata ka vlerësuar se ekziston dyshim i bazuar për kryerjen e veprave penale dhe ka miratuar kërkesën e Prokurorisë për caktimin e paraburgimit.
Sipas njoftimit zyrtar, dy të dyshuarit përballen me akuza të ndryshme. E.H. dyshohet për veprën penale “lëndim i rëndë trupor”, pasi më 11 prill 2026, rreth orës 20:15, në një parking në Ferizaj, pas një konflikti verbal, ka sulmuar me thikë personin tjetër, duke i shkaktuar lëndime trupore.
Ndërkohë, Betim Januzi (B.J.) dyshohet për “shkaktim të rrezikut të përgjithshëm” dhe “mbajtje të paautorizuar të armës”. Sipas hetimeve, gjatë përleshjes ai ka nxjerrë një armë zjarri dhe ka qëlluar dy herë në drejtim të tokës, duke rritur rrezikun për personat në afërsi. Po ashtu, dyshohet se arma dhe municioni i gjetur në posedim të tij kanë qenë pa leje.
Gjykata ka vendosur që të dyshuarit të qëndrojnë në paraburgim për 30 ditë, ndërsa ka sqaruar se një ankesë e mundshme ndaj këtij vendimi nuk e pezullon zbatimin e tij.
