Performanca e shumëpritur e Justin Bieber në festivalin Coachella ka ndezur debat të fortë në rrjetet sociale, ku një pjesë e mirë e publikut e ka cilësuar si zhgënjyese.
Pas një mungese disa-vjeçare nga skena, këngëtari 32-vjeçar u rikthye në Indio, Kaliforni, në një koncert për të cilin raportohet se është paguar rreth 10 milionë dollarë. Megjithatë, rikthimi i tij nuk arriti të përmbushë pritshmëritë e fansave.
Në pjesën e parë të performancës, Bieber u përqendrua te projektet e tij më të fundit, ndërsa më pas kaloi në një setlist ku u mbështet kryesisht te projeksione video nga YouTube. Ai interpretoi disa nga hitet e tij më të njohura, si “Baby”, “Never Say Never” dhe “Beauty and the Beat”, duke kënduar paralelisht me klipet që shfaqeshin në sfond.
Situata nuk kaloi pa u komentuar as nga kolegët, teksa Katy Perry ironizoi lehtë duke thënë: “Falë Zotit që ekziston Premium, nuk dua të shoh reklama.”
Reagimet online kanë qenë të forta, me shumë përdorues që e kritikojnë artistin për mungesë angazhimi dhe energjie në skenë, duke e cilësuar performancën si “të dobët” dhe “pa përpjekje”.
Megjithatë, ka pasur edhe zëra mbështetës që e kanë vlerësuar qasjen minimaliste të Bieber, duke theksuar se një artist nuk ka gjithmonë nevojë për spektakël të madh për të treguar talentin.
Ky koncert shënon rikthimin e tij të parë që nga “Justice World Tour” në vitin 2022 dhe, për disa, konsiderohet si një pikënisje e re në karrierën e tij artistike.
Së fundmi, Bieber ka folur hapur për sfidat personale dhe gjendjen e tij emocionale, duke ndarë shpesh reflektime me ndjekësit në rrjetet sociale.
