Ben Affleck duket se ka hequr dorë përfundimisht nga pjesa e tij në rezidencën luksoze në Beverly Hills, duke ia kaluar atë ish-bashkëshortes së tij, Jennifer Lopez, pa përfituar asnjë kompensim financiar.
Sipas raportimeve të fundit, ky vendim vjen pas rishikimit të marrëveshjes së ndarjes së pasurisë mes ish-çiftit, ku përfshihet një klauzolë që lejon transferimin e pronës mes bashkëshortëve. Burime pranë tyre bëjnë me dije se aktori ka zgjedhur t’ia lërë tërësisht pronën Lopez-it.
Vila, e blerë në qershor të vitit 2023 për rreth 60.85 milionë dollarë, konsiderohet një nga pronat më luksoze në zonë. Me një sipërfaqe prej afro 3,500 metrash katrorë, ajo përfshin 12 dhoma gjumi, 24 banjo dhe facilitete të shumta, përfshirë edhe një fushë basketbolli.
Pas divorcit të finalizuar në janar 2025, e ardhmja e kësaj prone mbeti për një kohë të gjatë e paqartë. Në verën e kaluar, të dy vendosën ta nxirrnin nga tregu, pasi nuk arritën të siguronin një ofertë të kënaqshme për shitje.
Ekspertët e pasurive të paluajtshme kanë theksuar se tregu për prona të kësaj vlere është sfidues, çka e bën të kuptueshme tërheqjen e saj nga shitja deri në përmirësimin e kushteve.
Me zhvillimin më të fundit, rezidenca tashmë kalon plotësisht në pronësi të Jennifer Lopez, e cila së fundmi është shprehur se po jeton një periudhë të re dhe ndihet më e lirë, dy vite pas ndarjes nga Affleck.
