Princi dhe Bigi Jackson janë shfaqur sërish në publik pas një periudhe të gjatë larg vëmendjes mediatike, duke marrë pjesë në premierën e filmit biografik “Michael”, e mbajtur në Berlin.
Dy djemtë e ikonës së muzikës pop tërhoqën vëmendjen në tapetin e kuq, ku u paraqitën me veshje që sillnin ndërmend stilin karakteristik të babait të tyre. Bigi u dallua veçanërisht për një detaj simbolik: një shirit në krah me imazhin e famshëm të Michael Jackson gjatë performancës së tij legjendare, ku ai përkulet në kënd 45 gradë.
Në këtë event morën pjesë edhe anëtarë të tjerë të familjes Jackson, përfshirë Jackie, Jermaine dhe Marlon, si dhe disa nga brezi i ri i familjes. Megjithatë, nuk munguan edhe absencat e dukshme, si Janet, LaToya dhe Paris Jackson.
Veçanërisht mungesa e Janet Jackson ka ngjallur reagime, duke qenë se ajo thuhet se nuk e mbështet projektin. Sipas burimeve pranë familjes, këngëtarja ka shprehur pakënaqësi për mënyrën si janë trajtuar disa aspekte të jetës së Michael në film.
Gjithashtu, raportimet flasin për tensione brenda familjes lidhur me realizimin e këtij projekti, përfshirë edhe një përplasje mes Janet dhe Jermaine Jackson. Pavarësisht këtyre polemikave, filmi “Michael” pritet të sjellë në ekran historinë dhe trashëgiminë e një prej artistëve më të mëdhenj në historinë e muzikës.
