Jeta di të krijojë lidhje të çuditshme mes së shkuarës dhe së tashmes, dhe historia e Selina Bollatit është një shembull perfekt për këtë. Së fundmi, një postim i saj i vjetër në Facebook, i publikuar në vitin 2011, është rikthyer në vëmendje dhe po qarkullon me shpejtësi në rrjet, duke ngjallur kureshtje mes ndjekësve të Big Brother VIP Albania.
Në atë kohë, kur ishte vetëm rreth 9 vjeç, Selina kishte shkruar: “Dr Flori Ca Na Ke me tekst 2011 ju persh” një përshëndetje e thjeshtë fëmijërore për një nga hitet më të njohura të artistit të ndjerë Dr. Flori, pjesë e grupit legjendar West Side Family.
Ajo që e bën këtë detaj edhe më interesant është rrjedha që ka marrë jeta e saj vite më pas. Sot, Selina ndodhet brenda shtëpisë së BBV, ku një nga personazhet më të komentuar është pikërisht Miri, anëtar i West Side Family. Marrëdhënia mes tyre ka kaluar nëpër shumë faza nga afrimiteti te përplasjet duke e mbajtur publikun të “mbërthyer” pas çdo zhvillimi.
Ironia e bukur e kësaj historie qëndron në faktin se të dy kanë arritur deri në finale. Selina dhe Miri janë tashmë përballë njëri-tjetrit në garën për çmimin e madh, që do të kulmojë brenda pak ditësh në natën finale.
Nga një vajzë e vogël që shpërndante këngët e Dr. Florit, në një finaliste që garon përballë një prej anëtarëve të atij grupi rrugëtimi i Selinës duket si një skenar i shkruar me kujdes. Sepse, në fund të fundit, jeta di të befasojë në mënyrat më të papritura.
