Regjisori dhe producenti Turjan Hysko ka folur ekskluzivisht për revistën Bordo rreth filmit të tij më të ri, “Kazerma”, duke ndarë prapaskenat e realizimit dhe sfidat financiare të këtij projekti ambicioz.
I pyetur për koston e filmit dhe mënyrën e sigurimit të fondeve, Hysko pranoi se sponsorizimi në kinemanë shqiptare mbetet një nga proceset më të vështira, pasi shpesh kërkon kompromise që prekin krijimtarinë artistike.
“Në fakt, sponsorizimi i filmave është shumë i vështirë, sepse ti, për të marrë sponsor, nuk duhet të cënosh goxha skenarin dhe mënyrën se si realizohet filmi. Kështu që unë shpresën e kam tek publiku, që të shkojë ta shohë në kinema, që të paktën mos të dalim me shumë humbje në këtë projekt shumë ambicioz,” tha Hysko për Bordo.
Sa i përket kostove të filmit, producenti u tregua i rezervuar për shifra konkrete, duke theksuar se shpenzimet ende nuk janë mbyllur, pasi faza e marketingut vazhdon.
“Kostot nuk i them dot sepse nuk kanë mbaruar akoma. Ka ende kosto marketingu, kështu që nuk mund t’i them ende. Por të bësh film nuk është e thjeshtë. Megjithatë, me njerëzit e duhur dhe me stafin mirëkuptues, realizohen gjëra të bukura,” u shpreh ai.
Filmi “Kazerma” është një nga prodhimet më të mëdha të Hyskos deri më tani dhe pritet të tërheqë interes të gjerë nga publiku shqiptar në sallat e kinemasë.
Për më tepër ndiqni intervistën më poshtë:
