Supermodelja dhe aktorja e njohur e serialit Dallas, Annabel Schofield, ka ndërruar jetë në moshën 62-vjeçare pas një beteje me kancerin.
Sipas raportimit të The Hollywood Reporter, Schofield u nda nga jeta më 28 shkurt në Los Anxhelos. Modelja me origjinë nga Uellsi kishte zbuluar më herët përmes një postimi në GoFundMe se kanceri i ishte përhapur në tru në muajin korrik, pas një lufte trevjeçare me sëmundjen.
Gjatë karrierës së saj të suksesshme në modë, Schofield ka qenë në kopertinat e revistës Vogue dhe ka realizuar fushata për marka të mëdha si Yves Saint Laurent, si dhe ka marrë pjesë në reklama për Rimmel, Revlon dhe Boots No.7.
Ajo u bë veçanërisht e famshme për rolin në një reklamë televizive të Bugle Boy Jeans, ku shfaqej duke drejtuar një Ferrari të zi në shkretëtirë dhe thoshte frazën ikonike: “Më falni, a janë ato xhinse Bugle Boy që keni veshur?”
Në fund të viteve ’80, Schofield u zhvendos në Los Anxhelos dhe interpretoi rolin e Laurel Ellis në serialin “Dallas”, duke u shfaqur në 12 episode në vitin 1988, sipas IMDb. Ajo gjithashtu luajti në filmat Dragonard, Solar Crisis dhe Eye of the Widow, si dhe në një episod të serialit Dangerous Curves në vitin 1992.
Përveç aktrimit, ajo kontribuoi edhe në produksion, duke qenë pjesë e ekipit të filmave The Brothers Grimm, Doom dhe City of Ember, sipas IMDb.
Larg kamerave, Schofield dokumentoi betejën e saj me kancerin përmes një serie postimesh në GoFundMe. Në postimin e saj të fundit më 18 janar, ajo tregoi se i ishte nënshtruar një operacioni për heqjen e një mase të madhe në zgavrën nazale, duke u shprehur se ndihej “e lëkundur dhe e dobët”, por e lehtësuar që mund të merrte frymë lirshëm përmes hundës.
Tributet për të nuk kanë munguar. Melissa Richardson, pronarja e Take Two Agency agjencia që e përfaqësoi Schofield në fillimet e karrierës e kujtoi me fjalë prekëse: “Ajo nuk ndryshoi kurrë nga vajza e ëmbël 17-vjeçare nga Uellsi që takova për herë të parë. Ishte besnike, e kujdesshme dhe mbi të gjitha, një bukuri e jashtëzakonshme. E njihte mjeshtërinë e saj. Ishte më e mira.”
