David Beckham dhe Victoria Beckham i kanë uruar publikisht ditëlindjen e 27-të djalit të tyre, Brooklyn Peltz Beckham, mes tensioneve të vazhdueshme familjare.
Ish-futbollisti 50-vjeçar publikoi më 4 mars dy fotografi të vjetra në Instagram Stories me djalin e tij. Në njërën prej tyre, David dhe Victoria shfaqen duke buzëqeshur në një pishinë, ndërsa në mes qëndron Brooklyn i vogël. “Ne të duam shumë x. 27 sot,” shkroi David, duke e etiketuar bashkëshorten e tij.
Në një tjetër imazh bardhë e zi, ku Brooklyn shfaqet pak më i rritur pranë të atit, Victoria shtoi: “Gëzuar ditëlindjen Bust. Të dua x”, duke e shoqëruar me një zemër rozë.
Edhe Victoria, 51 vjeçe, ndau mesazhe urimi në Instagram Stories. Ajo rishpërndau fotografinë nga pishina dhe shkroi: “Gëzuar ditëlindjen Brooklyn, të duam shumë”, si dhe publikoi një tjetër foto bardhë e zi me të birin kur ishte foshnjë, duke shtuar: “Gëzuar 27-vjetorin Brooklyn, të dua shumë”, e shoqëruar me zemra të kuqe.
Urimet publike vijnë në një kohë kur marrëdhëniet brenda familjes Beckham janë në qendër të vëmendjes. Në janar, Brooklyn bëri disa postime shpërthyese në Instagram Stories, ku akuzoi prindërit e tij se kishin tentuar të sabotonin martesën e tij me bashkëshorten, Nicola Peltz Beckham, 31 vjeçe.
Mes akuzave, ai pretendoi se prindërit kishin përhapur “gënjeshtra të panumërta”, kishin tentuar ta bindnin të hiqte dorë nga të drejtat mbi emrin e tij para dasmës dhe se Victoria kishte “ndërhyrë” në vallëzimin e parë të çiftit në dasmë. Brooklyn deklaroi se nuk dëshiron pajtim me familjen dhe se për herë të parë po “ngrihet për veten”.
Burime pranë situatës kanë theksuar se David dhe Victoria kanë kërkuar vazhdimisht të takohen me çiftin për të zgjidhur mosmarrëveshjet, ndërsa theksohet se David “i do fëmijët e tij mbi gjithçka”.
Pavarësisht përçarjes së raportuar, urimet publike për 27-vjetorin e Brooklyn tregojnë se prindërit e tij vazhdojnë të shprehin dashurinë dhe mbështetjen ndaj tij.
Galeria fotografike
