Paul Thomas Anderson ishte emri që dominoi mbrëmjen në edicionin e 78-të të Çmimeve të Shoqatës së Regjisorëve të Amerikës, të mbajtura në Los Angeles. Regjisori u vlerësua me çmimin për Arritje të Jashtëzakonshme Regjisore në Filmin e Metrazhit të Gjatë për veprën e tij më të fundit, “One Battle After Another”.
Ceremonia u zhvillua në ambientet e hotelit Beverly Hilton dhe u moderua nga aktori dhe komediani Kumail Nanjiani. Të pranishëm ishin figura të njohura të kinemasë amerikane, mes tyre Kate Hudson dhe Kerry Washington, duke e kthyer eventin në një festë të vërtetë të industrisë së filmit.
Gjatë fjalimit të pranimit, Anderson ndau emocionet e tij mbi procesin krijues dhe falënderoi bashkëpunëtorët që e shoqëruan në realizimin e filmit. Një nga momentet më prekëse ishte dedikimi që ai bëri për ndihmësregjisorin Adam Somner, i cili u nda nga jeta në nëntor 2024 pas një sëmundjeje të rëndë. Anderson e përshkroi Somnerin si një profesionist të jashtëzakonshëm dhe një njeri që dinte të krijonte besim dhe respekt në çdo set xhirimi.
Surpriza e mbrëmjes erdhi kur në skenë u shfaq Leonardo DiCaprio, i cili i dorëzoi personalisht Andersonit Medaljen e Filmit Metrazh të Guild of America. Aktori e vlerësoi regjisori për vizionin e tij unik, guximin artistik dhe aftësinë për të mbajtur audiencën gjithmonë të përfshirë.
Pas ceremonisë, Anderson dhe DiCaprio u panë së bashku në prapaskenë, ku u fotografuan në një moment që u bë ndër më të komentuarit e mbrëmjes, duke vulosur një natë të paharrueshme për kinemanë amerikane.
