Pas humbjes së rëndë të këngëtarit Shpat Kasapi, dhimbja nuk u kufizua vetëm te familja dhe miqtë. Në rrjetet sociale nisi një valë spekulimesh dhe komentesh të ashpra, që vunë në shënjestër bashkëshorten e tij, Selvije Jao, duke rikthyer thashetheme për probleme të supozuara në çift gjatë muajve të fundit.
Në mes të kësaj klime të rënduar, ka reaguar publikisht nëna e artistit të ndjerë, Gjylymser Kasapi, me një mesazh prekës dhe të prerë, që synon të ndalë çdo fjalë të ligë dhe të mbrojë nusen e saj në momentet më të vështira të jetës.
Në rrëfimin e saj, ajo ka ndarë detaje tejet të ndjeshme nga çastet e fundit të jetës së Shpatit, duke hedhur poshtë kategorikisht çdo pretendim për largësi apo ndarje mes çiftit. Sipas saj, këngëtari nuk ishte as i vetëm dhe as i braktisur emocionalisht.
Ajo zbulon se Shpati ndërroi jetë në praninë e Selvijes, e cila ishte pranë tij deri në frymën e fundit, ndërsa edhe djali i tyre i vogël, Roeli, ishte aty, pa kuptuar tragjedinë që po ndodhte. Një skenë familjare e mbushur me dhimbje, por edhe me dashuri, që rrëzon çdo narrativë të rreme të krijuar në rrjet.
Në reagimin e saj, Gjylymser Kasapi flet me respekt dhe admirim për Selvijen, duke e përshkruar si një grua të përkushtuar, me vlera dhe moral, dhe si një nënë shembullore. Ajo thekson se dashuria dhe lidhja mes Shpatit dhe bashkëshortes së tij kanë qenë të vërteta dhe të thella.
Madje, nëna e këngëtarit shprehet se prania dhe forca e Selvijes janë arsyeja kryesore që e ndihmojnë të përballojë këto ditë zie dhe dhimbjeje të paimagjinueshme.
E tronditur nga komentet fyese dhe spekulimet që po qarkullojnë, ajo ka dhënë edhe një paralajmërim të fortë publik, duke theksuar se çdo deklaratë apo insinuatë që cenon nderin e Selvijes dhe familjes, nuk do të tolerohet më.
Sipas saj, çdo shpifje e mëtejshme do të ndiqet jo vetëm në aspektin moral, por edhe ligjor, duke e bërë të qartë se dhimbja e kësaj familjeje nuk duhet të shndërrohet në objekt sulmi apo thashethemesh.
Mesazhi i nënës së Shpatit është ripostuar nga vetë Selvije Jao, e cila i është përgjigjur me disa fjalë të thjeshta, por të mbushura me ndjenjë: “Faleminderit loçka ime.”
