Jesy Nelson ka ndarë për herë të parë në detaje prapaskenat e largimit të saj nga Little Mix, përmes dokumentarit të ri në Prime Video, Jesy Nelson: Life After Little Mix. Artistja britanike foli hapur për presionin, vendimet e vështira dhe gjendjen e saj emocionale në periudhën para ndarjes nga grupi.
Sipas Nelson, situata brenda grupit ishte më e ndërlikuar nga sa është perceptuar publikisht. Ajo pretendon se një tjetër anëtare kishte menduar të largohej përpara saj, por në fund ishte ajo që doli e para nga formacioni, në dhjetor të vitit 2020.
“Kush largohet i pari zakonisht përballet me reagimet më të ashpra,” shprehet ajo në dokumentar, duke shtuar se largimi i saj nuk ishte planifikuar në atë mënyrë dhe se nuk kishte dashur të ishte e para që do të bënte hapin.
Nelson kujton se periudha 2017–2019 ishte kulmi i suksesit për Little Mix, me albumin LM5 dhe turne të mëdha ndërkombëtare. Por pas një takimi të papritur mes vajzave, ajo mësoi se njëra prej tyre kishte menduar të largohej – një moment që, sipas saj, e tronditi thellë. “Ishte si të më shembej bota,” rrëfen këngëtarja, pa zbuluar emra.
Pandemia e COVID-19 e përkeqësoi situatën, duke shtyrë planet për turneun përmbyllës dhe duke shtuar pasigurinë. Gjatë asaj kohe, Nelson tregon se filloi të përballej me probleme serioze të shëndetit mendor, përfshirë ankthin dhe sulmet e panikut.
Ajo e përshkruan xhirimin e klipit “Holiday” në korrik 2020 si një pikë kritike, kur pasiguritë për pamjen fizike dhe presioni për të humbur peshë u bënë dërrmuese. Gjendja e saj u rëndua edhe më shumë gjatë angazhimit në programin Little Mix The Search, kur kuptoi se nuk mund ta përballonte më ritmin dhe pritshmëritë.
“Isha thellësisht e trishtuar. E dija që mendërisht nuk isha më në gjendje ta vazhdoja,” shprehet ajo, duke zbuluar se në një moment përfundoi edhe në spital.
Në përpjekje për të menaxhuar situatën, Nelson kërkoi fillimisht këshillë ligjore, por komunikimi me grupin nuk ndodhi siç kishte shpresuar. Avokati i saj informoi vajzat për vendimin përpara se ajo të kishte mundësinë t’u fliste personalisht.
“Mendoj se ato u lënduan dhe më vjen keq që ndodhi në atë mënyrë. Doja të kisha pasur mundësinë t’u shpjegoja vetë arsyet e mia,” përfundon ajo në dokumentar, duke reflektuar mbi një nga periudhat më të vështira të jetës së saj.
