Zayn Malik ka rikthyer në vëmendje marrëdhënien e tij me Gigi Hadid, duke dhënë një sqarim të drejtpërdrejtë për ndjenjat që ka pasur ndaj saj. Në një intervistë për podkastin “Call Her Daddy” me Alex Cooper, publikuar më 11 shkurt, këngëtari foli me sinqeritet për mënyrën si e percepton sot dashurinë.
33-vjeçari iu referua një deklarate të bërë më herët në “The Zach Sang Show”, ku kishte thënë se nuk ishte i sigurt nëse kishte qenë ndonjëherë vërtet i dashuruar. I pyetur nëse vazhdon ta mendojë njësoj, ai u përgjigj se kuptimi i tij për dashurinë ka ndryshuar me kohën.
Sipas Malik, ajo që në një moment mund t’i jetë dukur si dashuri, më vonë e ka kuptuar se mund të ketë qenë pasion apo një ndjenjë tjetër e fortë, por jo domosdoshmërisht dashuri në kuptimin e plotë të fjalës.
Megjithatë, ai theksoi se respekti për Gigi Hadid mbetet i palëkundur. “Do ta dua gjithmonë, sepse ajo është nëna e fëmijës tim,” u shpreh ai, duke shtuar se ka vlerësimin maksimal për të, pavarësisht se nuk është i sigurt nëse ka qenë ndonjëherë i dashuruar me të.
Zayn dhe Gigi janë prindër të vajzës së tyre 5-vjeçare, Khai. Ata nisën lidhjen në vitin 2015 dhe gjatë marrëdhënies së tyre u panë shpesh në evente prestigjioze si MET Gala. Në vitin 2020 mirëpritën vajzën, ndërsa ndarja përfundimtare erdhi në 2021.
Fundit i lidhjes u shoqërua me raportime për tensione mes këngëtarit dhe Yolanda Hadid, nënës së Gigi-t. Malik i mohoi akuzat për dhunë, ndërsa më pas u bë e ditur se ish-çifti kishte vendosur të bashkëpunonte për të rritur vajzën në mënyrë të qetë dhe të civilizuar.
Pas ndarjes, Gigi Hadid u përfol për një romancë me aktorin Bradley Cooper, ndërsa Zayn Malik u lidh me thashetheme për një marrëdhënie të mundshme me Selena Gomez në vitin 2023.
