“Jam marrëzisht i dashuruar me të. Është thjesht një kënaqësi e jashtëzakonshme të punosh me të. Nuk mund ta lavdëroj sa duhet – po të flas sinqerisht.”
Këto ishin fjalët e Liam Neeson kur u pyet për kiminë e dukshme që ka me Pamela Anderson, partneren e tij në ribërjen e ardhshme të komedisë së famshme “The Naked Gun”. Në këtë version të ri, aktori 73-vjeçar rikthen në jetë rolin ikonik të togerit Frank Drebin, më parë i luajtur nga i ndjeri Leslie Nielsen. Ndërkohë, Anderson do të portretizojë Beth-in – të dashurën misterioze me nota “vampire”, një personazh që duket se është frymëzuar nga roli joshës i Jane Spencer, i interpretuar dikur nga Priscilla Presley.
Megjithatë, ajo që ka ngjallur më shumë interes se romanca e tyre në film është pikërisht afrimiteti i dukshëm mes dy aktorëve jashtë kamerës. Neeson, zakonisht i rezervuar në intervista, nuk e fshehu adhurimin e tij për Anderson-in, duke dhënë një koment të ndjerë e të përzemërt për të.
“Pa asnjë lloj egoje. Ajo thjesht vjen dhe e bën punën,” tha Neeson për revistën PEOPLE, duke shtuar: “Është qesharake dhe ka një lehtësi të jashtëzakonshme në bashkëpunim. Do të jetë e mrekullueshme në film.”
Nga ana e saj, Pamela Anderson – e cila është beqare që pas përfundimit të martesës së saj të pestë me Dan Hayhurst në vitin 2022 – nuk nguroi t’ia kthente komplimentin. Ajo e përshkroi Neeson si “të përulur” dhe “zotërinë e përkryer”, duke lënë të kuptohet për një respekt të ndërsjellë mes dy aktorëve edhe jashtë setit të xhirimeve.
“Ai nxjerr në pah më të mirën te ti… me respekt, mirësi dhe përvojë të thellë. Ishte një nder absolut të punoja me të”, tha ajo, duke shtuar: “Ai kujdesej sinqerisht për mua – më mbështolli pallton rreth meje kur kisha ftohtë”.
Ajo shtoi: “Mendoj se kam një mik të përjetshëm, Liamin, dhe padyshim që kemi një lidhje shumë të sinqertë, shumë të dashur, dhe ai është një djalë i mirë. Ai është vërtet një djalë qesharak. Ndonjëherë sillet si një djalë i vogël”.
