Një video e vitit 2001, që po riqarkullon ditët e fundit në rrjetet sociale, ka sjellë një valë nostalgjie për publikun shqiptar. Bëhet fjalë për konkursin e bukurisë “Miss Albania 2001”, një nga ngjarjet më të rëndësishme të asaj kohe, ku morën pjesë vajza nga i gjithë vendi dhe trojet shqiptare.
Interesant është fakti se shumë prej konkurrenteve të asaj mbrëmjeje janë sot emra të njohur në muzikë, televizion dhe showbiz. Në video shihen të reja si Anxhela Peristeri, Anjeza Maja, Albana Osmani, Liberta Spahiu e Drenusha Latifi, të cilat më pas u shndërruan në figura publike të dashura e të suksesshme.
Anxhela Peristeri, që në atë kohë sapo kishte nisur rrugëtimin e saj artistik, do të bëhej më vonë një nga këngëtaret më të spikatura shqiptare, duke përfaqësuar Shqipërinë edhe në Eurovision.
Anjeza Maja, e cila sot njihet si një nga gazetaret dhe prezantueset më serioze të ekranit, u shfaq për herë të parë në këtë skenë.
Albana Osmani po ashtu i hapi dyert e karrierës përmes këtij konkursi, duke u kthyer më vonë në një nga figurat më të njohura të televizionit.
Nga Prishtina vinte Liberta Spahiu, që sot është ndër prezantueset më të dashura në Kosovë.
Ndërsa Drenusha Latifi, atëherë në fillimet e saj, do të vijonte rrugën si këngëtare dhe modele e njohur.
“Miss Albania 2001” kujtohet sot jo vetëm si një garë bukurie, por edhe si një trampolinë e vërtetë për shumë vajza që më pas ndërtuan karriera të suksesshme në art dhe media.
Galeria fotografike
