Mes emocioneve të mëdha, lotëve të gëzimit dhe një atmosfere të kuruar deri në detajin më të vogël, vëllai i moderatores ikonë të ekranit shqiptar, Arbana Osmani, i dha fund beqarisë. Ceremonia, e organizuar mbrëmjen e kaluar, mblodhi familjarë dhe miq të afërt të familjes Osmani, të cilët festuan e trokitën gotat për fillimin e një kapitulli të ri në jetën e Sidritit dhe partneres së tij.
Një nga momentet më të veçanta të mbrëmjes ishte fjalimi i Arbanës për të atin. Me fjalë të ngrohta e të menduara me kujdes, moderatorja emocionoi të pranishmit dhe i dhuroi babait të saj një surprizë të paharrueshme: këngëtarin e tij të preferuar, Sinan Hoxhën. Kënga e tij mblodhi të gjithë të ftuarit rreth një tryeze të rrumbullakët, ku kënduan dhe kërcyen pa mbarim.
Por, përveç momenteve të ëmbla dhe surprizave, vëmendjen e mori edhe pamja e Arbanës. E veshur me një fustan madhështor të “Roberto Cavalli”, me print xhaguari, që kushton 3500 euro, ajo shkëlqeu si gjithmonë – këtë herë duke ia lënë protagonizmin nuses, por duke mbetur po aq e paharrueshme në sy të të gjithëve.
