Banorja e Big Brother VIP Kosova 4, Alba Pollozhani, ka kërkuar për herë të dytë largimin nga gara, duke sjellë tension dhe diskutime gjatë spektaklit “Prime” të së hënës në mbrëmje.
Pas përplasjeve të ashpra në shtëpi, ku u përfshi edhe Lim Hoti, Alba u shpreh hapur se nuk dëshironte më të vijonte lojën. “Dua të largohem nga Big Brother, vendimi im është i prerë”, deklaroi ajo para banorëve dhe publikut.
Menjëherë pas kësaj, produksioni bëri me dije se konkurrentja ndodhej në një gjendje të rënduar emocionale dhe se po merrte kujdesin e nevojshëm mjekësor për të garantuar shëndetin dhe mirëqenien e saj.
Megjithatë, pak më vonë, Alba u shfaq në Dhomën e Rrëfimit me një qëndrim disi më të moderuar. Ajo tha se kishte gjetur forcën për të vazhduar përkohësisht në lojë dhe se do ta rishqyrtonte vendimin e saj deri të premten, përpara se të merrte një vendim përfundimtar.
Situata ka ngritur shumë pikëpyetje si brenda shtëpisë, ashtu edhe tek ndjekësit e formatit, ndërsa mbetet për t’u parë nëse Alba do të vazhdojë rrugëtimin në Big Brother VIP Kosova 4 apo do të zgjedhë largimin përfundimtar nga gara.
