Valentino Garavani, krijuesi i famshëm italian që themeloi shtëpinë e tij të modës në vitin 1960 dhe fitoi famë botërore duke veshur mbretër europianë, zonja të para amerikane dhe yje të kinemasë, ka ndërruar jetë në shtëpinë e tij në Romë, në moshën 93-vjeçare.
Me mjeshtëri të pakrahasueshme në krijimin e modeleve, nuancën e tij ikonike të kuqes “Valentino” dhe vëmendjen ndaj detajeve femërore si fjongo, rufla, dantella dhe qëndisje, Valentino ishte një nga arkitektët kryesorë të glamurit të shekullit të 20-të.
Koleksionet e tij veshën yje si Elizabeth Taylor, Audrey Hepburn dhe Sophia Loren. Jackie Kennedy zgjodhi një fustan të bardhë të Valentino-s për martesën me Aristotle Onassis, ndërsa dekada më vonë, një krijim i tij për të njëjtën zonjë të parë u interpretua nga Jennifer Lopez në Oscars 2003. Julia Roberts e pranoi çmimin “Best Actress” për filmin Erin Brockovich në një fustan vintage të Valentino-s.
Në vitin 2009, ai ishte protagonist i dokumentarit Valentino: The Last Emperor, ku fliste për pasionin e tij për bukurinë dhe kuptimin e dëshirave të grave: “Unë di çfarë duan gratë, duan të jenë të bukura.”
Valentino lindi më 11 maj 1932 në Voghera, Itali, dhe filloi karrierën e tij në modë që në moshë të re, duke studiuar në Milano dhe më pas në Paris. Ai punoi me emra të njohur si Jean Dessés dhe Guy Laroche para se të hapte shtëpinë e tij në Via Condotti, Romë. Që nga fillimet, ai spikati për elegancën dhe lidhjen me yjet e kohës. Koleksioni i tij “All White” i vitit 1968 konsolidoi vendin e tij në historinë e modës italiane, por ai gjithmonë do të lidhet me nuancën e kuqe të shndritshme që simbolizon pasionin dhe elegancën italiane.
Edhe pas tërheqjes nga puna në vitin 2008, Valentino mbeti aktiv në botën e modës, duke ndjekur nga afër koleksionet e reja dhe duke shpërndarë stilin dhe vizionin e tij për brezat e ardhshëm të krijuesve.
Valentino Garavani do të mbahet mend jo vetëm për krijimet e tij të jashtëzakonshme, por edhe për mënyrën si jetoi jetën që kishte dizajnuar në bukuri, luks dhe elegancë të përhershme.
