Modelja e njohur Dajana Kalo po përballet me një nga sfidat më të vështira të jetës së saj, pasi ka pësuar një hemorragji cerebrale si pasojë e një Malformacioni Arteriovenoz (MAV), një gjendje serioze dhe potencialisht kërcënuese për jetën. Detaje te reja kane dale ne lidhje me gjendjen e saj shëndetësore: 25-vjeçarja ka humbur aftësinë për të lëvizur dorën dhe këmbën e djathtë dhe prej gati një muaji ndodhet e shtruar në spital nën kujdes intensiv mjekësor. Në ditët në vijim, Dajana pritet t’i nënshtrohet një ndërhyrjeje urgjente në tru, ndërsa rruga e saj drejt rikuperimit parashikohet të jetë e gjatë dhe e vështirë.
Motra e saj, Bora Kalo ka hapur një fushatë GoFundMe për të përballuar kostot e larta të trajtimit, ndërhyrjes kirurgjikale dhe rehabilitimit. Përmes një mesazhi prekës, ajo shpjegon se Malformacioni Arteriovenoz (AVM) është një anomali e enëve të gjakut në tru, e cila mund të shkaktojë hemorragji pa paralajmërim.
Mesazhi i motrës së Dajana Kalos:
Unë jam Bora, motra e Dajana Kalo. Prej pothuajse një muaji, Dajana, 25 vjeçe, ndodhet e shtruar në spital ne Tirane, pasi ka pësuar një hemorragji në tru, e shkaktuar nga Malformacioni Arteriovenoz (AVM), një gjendje serioze dhe kërcënuese për jetën, ku enët e gjakut në tru janë të formuara në mënyrë jonormale dhe mund të çahen pa paralajmërim. Kjo ka qenë një periudhë jashtëzakonisht e vështirë për ne. Dajana është e re, e fortë dhe e vendosur për t’u shëruar, por rruga e saj është ende e gjatë. Ajo ka nevojë për ndërhyrje kirurgjikale në tru, e ndjekur nga një proces i gjatë dhe i lodhshëm rehabilitimi.
Aktualisht po shqyrtojmë mundësi në spitalin publik, spitale private ose trajtim jashtë vendit per trajtimin pas operacionit, ku ekzistojnë ekspertiza dhe teknologjia e nevojshme. Këto alternativa kanë kosto shumë të larta, të cilat nuk mund t’i përballojmë vetëm. Po e nisim këtë fushatë GoFundMe për të mbuluar shpenzimet e mëposhtme: -Ndërhyrjen kirurgjikale në tru -Shtrimet në spital dhe kujdesin mjekësor -Medikamentet dhe trajtimin pas operacionit -Fizioterapinë dhe rehabilitimin -Rikuperimin afatgjatë dhe shpenzimet e përditshme të jetesës Dajana nuk do të jetë në gjendje të punojë për një periudhë të gjatë kohe, pasi aktualisht nuk është në gjendje të ecë dhe të lëvizë anën e djathtë të trupit, këmbën dhe dorën.
Edhe unë do të duhet të ndërpres punën për t’u kujdesur për të me kohë të plotë gjatë rikuperimit të saj. Kjo e bën barrën financiare edhe më të rëndë, përveç ngarkesës emocionale që po përjetojmë. Çdo donacion, pavarësisht shumës, do të shkojë drejtpërdrejt për t’i dhënë Dajanës mundësinë më të mirë për shërim dhe një jetë normale. Nëse nuk keni mundësi të dhuroni, shpërndarja e kësaj fushate do të ishte po aq e vlefshme për ne. Nga zemra, ju falënderojmë për mirësinë, mbështetjen dhe lutjet tuaja në këtë periudhë kaq të vështirë.
Me mirënjohje, Bora Kalo
