Më 3 mars, qielli do të ofrojë një spektakël të rrallë astronomik: një eklips total hënor, i njohur ndryshe si “hëna e përgjakur”.
Gjatë kësaj nate, Hëna do të futet plotësisht në hijen e Tokës, duke marrë një nuancë të kuqërremtë karakteristike. Ky fenomen ndodh kur rrezet e Diellit përthyhen në atmosferën e Tokës dhe filtrohen, duke lejuar që vetëm drita me gjatësi valore më të gjatë – ajo e kuqe – të arrijë në sipërfaqen e Hënës.
Eklipsi pritet të zgjasë rreth gjashtë orë në total, ndërsa faza e plotë do të jetë momenti më spektakolar për t’u vëzhguar. Fenomeni do të shihet më qartë në Amerikën e Veriut dhe Qendrore, në pjesën perëndimore të Amerikës së Jugut, si dhe në Australi, Zelandën e Re dhe Azinë Lindore.
Astronomët sugjerojnë që vëzhgimi mund të bëhet pa pajisje të posaçme, por një teleskop apo dylbi do ta bëjnë përvojën edhe më mbresëlënëse.
