Situata e tensionuar në Lindjen e Mesme po kërcënon pjesëmarrjen e Iranit në Kupën e Botës 2026. Konflikti i fundit në rajon, me përfshirjen e Shteteve të Bashkuara dhe Izraelit, ka vënë në pikëpyetje sigurinë e lojtarëve dhe stafit, duke bërë që futbolli të kalojë në plan të dytë për autoritetet iraniane.
Presidenti i Federatës Iraniane të Futbollit ka theksuar se, në këto kushte, është e vështirë të flitet për pjesëmarrje në një turne kaq të madh. Mundësia e tërheqjes ose e përjashtimit të Iranit nga Botërori mbetet e hapur, ndërsa FIFA dhe organizatorët e garës, që do të zhvillohet në SHBA, Meksikë dhe Kanada nga 11 qershori 2026, po shqyrtojnë opsionet alternative për të ruajtur balancën sportive.
Sipas burimeve sportive, kandidati më i mundshëm për të zëvendësuar Iranin në Grupin G do të ishte Iraku, i cili në këtë rast do t’i bashkohej Belgjikës, Zelandës së Re dhe Egjiptit. Një ndryshim i tillë do të shkaktonte përfitime edhe për Emiratet e Bashkuara Arabe, të cilat mund të marrin vendin e Irakut në ndeshjet e playoff-it ndërkontinental kundër Bolivisë dhe Surinamit.
Çdo vendim përfundimtar do të merret vetëm pas vlerësimeve zyrtare dhe monitorimit të situatës politike, ndërsa futbolli mbetet në pritje të qartësimit të kësaj krize.
